احذر المخدرات الرقمية: الحقيقة التي لا يخبرك بها أحد

 ليه ربنا بيخلينا نتوجع ؟

أنا عارفة أن السؤال ده بييجي ف دماغ كتير مننا بالذات بمجرد ما بنتعرض لموقف أو تجربة مؤلمة.. ومش السؤال ده بس.. دي أسئلة كتيرة أوي بتزيد علينا ف أكتر وقت بنكون ضعاف وموجوعين فيه.

وف المقال ده هحاول أجاوبك على أسئلة كتير بتدور ف دماغك ناحية الموضوع ده.. ف تابع معايا واقرأ للآخر.

الإحساس الأول بعد موقف أو تجربة مؤلمة

بمجرد ما بنتعرض لموقف أو تجربة مؤلمة بنحس بالظلم والحيرة.. بنحس بالقهرة وبالزعل على نفسنا.. بنفضل نسأل نفسنا.. طب ليه ده حصل؟؟ طب ليه أنا؟؟ طب إيه الحكمة ف كدة؟؟ وأسئلة غيرها كتير ناتجة عن وجع كبير.

وف نفس الوقت برضو بنكون عارفين من جوانا أن ربنا مش بيعمل حاجة شر.. ربنا مش بيعمل غير الخير وبس.. بس إحنا للأسف ف اللحظات دي مش بنكون قادرين نشوف ونفهم ده.. مبنكونش شايفين غير أن الألم ده شر.. الأفكار السلبية الغلط هي اللي بتكون مسيطرة علينا بشكل كبير.

من ضمن الأفكار السبية دي هي أن اللي حصل معانا ده أكيد عقاب من ربنا، لأ طبعًا الفكرة دي غلط.. مش دايمًا الألم ده عقاب.. أوقات كتير بيكون حاجة كويسة وف صالحنا اصلًا!

أسباب ممكنة للألم

أنت تعرف أن ساعات كتير الألم ده ف حد ذاته بيكون رحمة كبيرة أوي من ربنا؟؟

طب أزاي؟ هقولك أزاي.

ـ أوقات بيكون الوجع اللي أنت حاسس بيه اختبار من ربنا.. يشوف مدى صبرك و إيمانك وهتتصرف أزاي ف الموقف اللي أنت فيه ده.

ـ أوقات بيكون الوجع حماية لينا، ممكن يكون اللي حصل ده حماية لينا من حاجة وحشة كانت هتحصل لنا قدام.

ـ أوقات بيكون الوجع توجيه لينا وتغيير مسار ف حياتنا، مهو في دروس مش بنتعلمها غير بالتجارب القاسية.. وفي حاجات مش هتتغير ف شخصيتنا ولا حياتنا غير بالطريقة دي رغم أنها مؤلمة جدًا لينا بس ضرورية.

أشياء سوف تفهمها لاحقًا وأشياء لن تفهمها

عايزة أقولك بقا أنك مع الوقت في حاجات كتير هتفهمها وهتعرف هي حصلت معاك ليه.. في اسئلة كتيرة ممكن مع الوقت تعرف إجابتها وساعتها إحساسك بيتبدل تمامًا لأنك بتشوف بعينك اللي كان غايب عنك.

بس عايزة أقولك حاجة تانية برضو وهي أنه مش شرط مع الأيام تفهم اللي حصل معاك ده حصل ليه ومش لازم كل الإجابات اللي كنت مستنيها تلاقيها، بس ده مش معناه أن مفيش سبب للي حصلك ده.. لأ طبعًا في حكمة غايبة عنك وربنا بس هو اللي يعرفها ومش لازم أنت كمان تعرفها على فكرة، بس المهم يكون عندك يقين وثقة ف الله أنه عملك الأحسن ليك.

طمأنة

عايزاك دايمًا تكون واثق أن ربنا أرحم بينا من أي حد مهما كان مين ومهما كانت درجة قربه منك.. ربنا مفيش أحن منه.. أنت بس اللي مش شايف الصورة كاملة.. بس خلي الفكرة دي دايمًا موجودة جوة عقلك وقلبك.

وف النهاية حابة أقولك أن ربنا مطلع وشايف وحاسس بيك.. ربنا دايمًا موجود وجمبك.. اصبر وثق ف ربنا وف أنه مش بيعمل أي حاجة وحشة حتى لو اللي حاصل معاك ميتشافش غير كدة. خليك متأكد أن الوجع ف حد ذاته خير ليك.